Սեպտեմբերի 28 2023
Իտալական Տրիկասեում (սեպտեմբերի 18-24-ը) կայացած Սալենտոյի միջազգային 20-րդ կինոփառատոնի մրցութային ծրագրում ընդգրկված «Ամերիկացի» (ռեժ. Մայքլ Ա. Գուրջյան) ֆիլմի գլխավոր դերակատար Մայքլ Ա. Գուրջյանն արժանացել է «Լավագույն դերասան» մրցանակին:
Պետական աջակցություն ստացած «Ամերիկացին» (Միքայել Ա. Գուրջյան) ցուցադրվել է Տրիկասեի Պալացո Գալոնե (Palazzo Gallone, Throne room) միջնադարյան ամրոցի գահասրահում և ջերմորեն ընդունվել հանդիսատեսի կողմից։
Սալենտոյի փառատոնը սպասված իրադարձություն է կինոսերների և կինոյի մասնագետների համար։ Կինոստուգատեսի առաջնային նպատակը կինոարվեստի հանրայնացումն է, ինչպես նաև այն ծառայում է որպես համագործակցության հարթակ կինոգործիչների, դերասանների, պրոդյուսերների համար:
Հայաստանի ազգային կինոկենտրոնի համագործակցությունը Սալենտոյի միջազգային կինոփառատոնի հետ երկար տարիների՝ շուրջ 10 տարվա պատմություն ունի։ Փառատոնի կազմակերպիչները գրեթե ամեն տարի իրենց ծրագրերում ընդգրկում են նաև հայկական ֆիլմեր:
Այս տարի՝ Պալացո Գալոնե (Palazzo Gallone, Throne room) միջնադարյան ամրոցի գահասրահում, տեղի ունեցավ Հայ կինոյի 100-ամյակին նվիրված ֆոտոցուցահանդեսը, որի բացման արարողությանը ներկա էր նաև Տրիկասեի քաղաքապետ՝ Անտոնիո դի Դոննոն:
