Եվրիմաժ

 ՀԱԿԻՐՃ ՏԵՂԵԿՈՒԹՅՈՒՆ

ՀԱՅԱՍՏԱՆԻ ԱԶԳԱՅԻՆ ԿԻՆՈԿԵՆՏՐՈՆԻ ԵՎՐՈՊԱԿԱՆ ԽՈՐՀՐԴԻ «ԵՎՐԻՄԱԺ» ՀԻՄՆԱԴՐԱՄԻՆ ԱՆԴԱՄԱԿՑԵԼՈՒ ԳՈՐԾՈՒՆԵՈՒԹՅԱՆ ՄԱՍԻՆ

 

 

Եվրիմաժը (Eurimages) համատեղ կինոարտադրության, կինոնկարների վարձույթի և ցուցադրության աջակցության  Եվրոպական ամենախոշոր հիմնադրամն է, որը ստեղծվել է 1988թ.: Եվրոպական խորհրդի 47 երկրներից 39-ը (Հայաստանը ներառյալ) անդամակցում են Եվրիմաժին: Նախկին խորհրդային հանրապետություններից Եվրիմաժի անդամ են՝ Ռուսաստանը, Բալթյան երկրները, Վրաստանը և Ուկրաինան:

Ոչ Եվրոպական երկրներից վերջին երկու տարում Եվրիմաժի անդամ են դարձել նաև Կանադան և Արգենտինան: Հայաստանը Եվրիմաժի անդամ  է դարձել 2016 թ․ հունվարին։

Անդամակցության առավելություններն են՝ Հայաստանը ներգրավվում է Եվրոպական կինոարտադրության ցանցին, տեսանելի է դառնում որպես ֆիլմ արտադրող երկիր, Հայաստանի կինոարտադրության առջև բացվում են եվրոպական կինոշուկայի դռները: Եվրիմաժը նաև աջակցում է կինոթատրոններին և տեղական դիստրիբուցիոն ցանցի զարգացմանը, ուսուցանում  է երիտասարդ հայ կինոգործիչներին միջազգային ստանդարտներին համապատասխան  կինոնախագծերի փաթեթներ կազմելուն և  հայտեր ներկայացնելուն:

 

Հայաստանն անդամակցելով Եվրիմաժին՝ ապահովում է Եվրիմաժի Կառավարման խորհրդում հայկական կողմի ակտիվ մասնակցությունը, ֆինանսական աջակցություն ստանալու նպատակով հայկական կինոնախագծերի ներկայացում ու պաշտպանում, համատեղ արտադրության համար անհրաժեշտ կապերի ստեղծում, նախագծերի քննարկում՝ անդամ երկրների համապատասխան ներկայացուցիչների հետ:

 

Եվրիմաժ հիմնադրամի ֆինանսական աջակցություն է տրամադրվել  հետևյալ ֆիլմերին․

2016թ.-«Սպիտակ»,  գեղարվեստական լիամետրաժ ֆիլմ, ռեժիսոր՝ Ալեքսանդր Կոտ (minority coproduction):

 

2017թ.-«Ֆաբրիկա», գեղարվեստական լիամետրաժ ֆիլմ, ռեժիսոր՝ Յուրի Բիկով, (ռուս-ֆրանս-հայկական նախագիծ, minority coproduction):

 

2018թ.-«Երբ որ քամին հանդարտվի» գեղարվեստական լիամետրաժ ֆիլմ, ռեժիսոր՝ Նորա Մարտիրոսյան, (ֆրանս-հայ-բելգիական նախագիծ)։

Նորա Մարտիրոսյանի «Երբ որ քամին հանդարտվի» ֆիլմը 2020թ․-ին ընդգրկվել է ամենահեղինակավոր՝ Կաննի 73-րդ միջազգային կինոփառատոնի երկու մրցութային անվանակարգերում՝ la Sélection Officielle du Festival de Cannes և ACID:

 

2019թ․-«Ավրորայի լուսաբացը» վավերագրական-անիմացիոն կինոնախագիծ, ռեժիսոր՝ Իննա Սահակյան, (հայ-գերմանական կինոնախագիծ):

 

2021թ․-«Լուկա» (աշխատանքային վերնագիրը «Ամրոց») խաղարկային ֆիլմի կինոնախագիծ, ռեժիսոր՝ Ջեսսիկա Վուդվորթ (Բելգիա, Նիդերլանդներ, Իտալիա, Բուլղարիա, Հայաստան համատեղ արտադրություն):

 

Եվրիմաժի պաշտոնական կայքէջ՝ www.coe.int/eurimages

Եվրիմաժի աջակցման ծրագրեր՝ www.coe.int/eurimages/programmes