«ՏՈՒՆԸ ՀՐԱԲԽԻ ՎՐԱ»․ ՀԵՂԱՓՈԽԱԿԱՆ ՊԱՅԹՅՈՒՆ ԼՌՈՒԹՅԱՆ ԴԱՐԱՇՐՋԱՆՈՒՄ

 

 

Հայկական համր կինոյի 1928թ․ գլուխգործոցը համարվող «Տունը հրաբխի վրա» ֆիլմը նկարահանվել է Բաքվում՝ հայկական կինոյի հիմնադրի՝ Համո Բեկնազարյանի կողմից։ Ներկայացնելով նավթահորերի հայ և ադրբեջանցի աշխատողների պայքարը բազմազգ նավթային մագնատների բռնաճնշումների դեմ, որոնք 20-րդ դարի սկզբին անխնա շահագործում էին աշխատավորներին, այս ֆիլմը փայլուն կերպով համակցում է պատմական ֆիլմերի՝ էքշըն, թրիլեր և քարոզչական ժանրերի տարրերը։ Ոգեշնչվելով Սերգեյ Էյզենշտեյնի և Վսևոլոդ Պուդովկինի աշխատանքներով՝ Բեկնազարյանը կարողացել է ստեղծել ժամանակակից դինամիկ կինոյի իր սեփական տեսլականը՝ օգտագործելով ավանգարդային մոնտաժային տեխնիկա և գործողությունների համարձակ հաջորդականություն, որը մինչև հիմա ապշեցնում է իր իրատեսականությամբ։ 35 մմ պոզիտիվ կինոժապավենից թվայնացված ֆիլմը ներկայացված է երաժշտական նոր գործիքավորմամբ, որի հեղինակը բրիտանացի սկսնակ երգահան Ջուլիետ Մերչանթն է։

 

Համո Բեկնազարյանի ծննդյան 130-րդ տարեդարձին նվիրված այս նախագծի համահեղինակներ են՝ Հայաստանի ազգային կինոկենտրոնը և «Կինոկլասիկա» հիմնադրամը: Նախագծի շնորհանդեսը նախատեսված է 2022թ․ սեպտեմբերին՝ Լոնդոնում և Երևանում։

 

 

ԱՌԱՋԻՆ ՖԻԼՄԵՐԻ ՎԵՐԱԿԱՆԳՆՈՒՄԸ․ ՀԱՄՈ ԲԵԿՆԱԶԱՐՅԱՆԻ ՄՈՌԱՑՎԱԾ ԵՐԿՈՒ ԳԼՈՒԽԳՈՐԾՈՑԸ

 

Համո Բեկնազարյանի «Երկիր Նաիրի» (1930թ․) փաստագրական համր դրաման, որը ստեղծվել է սովետահայ կինոյի ձևավորումից հինգ տարի հետո, բացառիկ տեղ է գրավում ոչ միայն հայկական, այլև խորհրդային կինոպատմության տարեգրությունում։ Միահյուսելով արխիվային նյութերը, բեմադրված տեսարանները և դիտողական կադրերը՝ Բեկնազարյանը ստեղծել է Հայաստանի խորհրդային հանրապետության առաջին տասնամյակի պոետիկ և կալեյդոսկոպիկ հրաշալի պատկերը։ Շրջանցելով ֆիլմափաստագրման ավանդական մոտեցումները՝ ռեժիսորը գրեթե սյուրռեալիստական հարթության հասավ իր ամենաավանգարդային ստեղծագործությունում, որը հիրավի կարելի է համարել փաստագրական կինոյի վաղ ժամանակաշրջանի ինքնաբավ գոհարներից մեկը։ Մեկ տասնամյակ հետո աշխատելով բոլորովին այլ պայմաններում՝ խորհրդային կինեմատոգրաֆիայի հանդեպ Ստալինի գաղափարախոսական խիստ վերահսկողության ներքո, Բեկնազարյանին հաջողվեց շարունակել մարդասիրական մեծ պատմությունների իր ուսումնասիրությունը «Դուստրը» հակաֆաշիստական հուզիչ ֆիլմում (1942թ)։ Այս երկու ֆիլմերը, որոնք գործնականում թողարկումից հետո ոչ ոք չի դիտել, բացահայտում է ռեժիսորի կինոարվեստի հարուստ բազմազանությունը և նրա աշխատանքի հիմքում ընկած խոր ունիվերսալիստական գաղափարները։

 

Համո Բեկնազարյանի 130-րդ տարեդարձի կապակցությամբ Հայաստանի ազգային կինոկենտրոնը պատրաստվում է 35 մմ պոզիտիվ արխիվային կինոժապավեններից վերականգնել և թվայնացնել «Երկիր Նաիրի» և «Դուստրը» ֆիլմերը, որոնց նոր 4K պատճենները ներկայացվելու են և՛ Հայաստանի կինովարձույթում, և՛ միջազգային փառատոններում։

 

 

ԿԱՊ ՄԵԶ ՀԵՏ

  • +374 (10) 52-20-32
  • +374 (10) 52-20-38
  • kinokentron@gmail.com
  • Տերյան 3ա
×

Դուք չեք լրացրել բոլոր պահանջվող դաշտերը