Ապրիլի 26 2022
Հայաստանի ազգային կինոկենտրոնի տնօրեն Շուշանիկ Միրզախանյանը և Հայաստանի ազգային արխիվի տնօրեն Գրիգոր Արշակյանը ապրիլի 26-ին ստորագրեցին համագործակցության Հուշագիր։ Երկու կառույցների (ՊՈԱԿ) պատասխանատուների խոսքերով, սույն Հուշագիրը ենթադրում է երկարաժամկետ համագործակցություն՝ Ազգային արխիվի Կինոֆոտոֆոնո փաստաթղթերի և ապահովագրական պատճենների մասնաճյուղում պահպանվող հայկական կինոնկարների (խաղարկային, վավերագրական, անիմացիոն, խրոնիկալ) պահպանման, թվայնացման և հանրահռչակման ուղղությամբ։
Հայաստանի ազգային կինոկենտրոնի տնօրեն Շ․ Միրզախանյանի խոսքով, Հայ կինոյի 100-ամյա հոբելյանին ընդառաջ, համագործակցությունը կսկսեն անցյալ դարասկզբի հայկական կինոարտադրանքի՝ Համո Բեկնազարյանի համր ֆիլմերի (ժապավենների) վերականգնման, թվայնացման աշխատանքներից։ Նրա համոզմամբ, անելիքները շատ են և չափազանց կարևոր, և այս Հուշագրի ստորագրումը մեծապես նպաստելու է այդ աշխատանքներին։
Գրիգոր Արշակյանն էլ շեշտեց, որ Կինոֆոտոֆոնո արխիվում պահպանվող հազարավոր նյութեր կարիք ունեն լուրջ ուսումնասիրության և հանրայնացման։ Համապատասխան հնարավորությունների առկայության պարագայում այդ ամենը պետք է ի մի բերել, քանի որ նպատակը մեկն է պետության շահը, իսկ մեր երկկողմ մտադրությունները այս պարագայում լիովին համընկնում են։
Որպես Հուշագրի ստորագրման խորհուրդ, Ազգային արխիվի տնօրենը՝ Գրիգոր Արշակյանը Ազգային կինոկենտրոնին նվիրաբերեց 1923 թվականի ապրիլի 16-ին Հայ կինոյի ստեղծման որոշման պատճենը։
Հուշագրի ստորագրմանը ներկա էին ՀՀ ԿԳՄՍ նախարարության Ժամանակակից արվեստի վարչության պետ՝ Սվետլանա Սահակյանը, գլխավոր մասնագետ Լուսինե Սարգսյանը, Կինոֆոտոֆոնո փաստաթղթերի և ապահովագրական պատճենների մասնաճյուղի վարիչ՝ Ավագ Հարությունյանը։
