ՀՀ կառավարության որոշմամբ 2006 թվականին ստեղծված «Հայաստանի ազգային կինոկենտրոն» ՊՈԱԿ-ը մասնակցելով կինոարվեստի բնագավառում պետական մշակութային քաղաքականության իրականացմանը` շարունակում է հայկական կինոյի ավանդույթները, պահպանում, տարածում և զարգացնում է հայկական կինոարվեստը: Կինոկենտրոնը պետական ֆինանսական աջակցություն իրականացնող կազմակերպություն է, որն աջակցում է թե՛ լիամետրաժ, թե՛ խաղարկային և թե՛ անիմացիոն նախագծերի։

Միջպետական և միջազգային կազմակերպությունների հետ ունեցած պայմանագրերով կինոկենտրոնն աջակցում է երկրում իրականացվող համատեղ արտադրությանը, դեբյուտային ծրագրերի իրականացմամբ նպաստում է ստեղծագործական ներուժի բացահայտմանը, և ասպարեզ բերելով երիտասարդ կինոգործիչներին՝ ապահովում հայ կինոյի շարունակականությունը:

Մասնագիտական որակավորման բարձրացման նպատակով կինոկենտրոնը կազմակերպում է կինոարտադրողների պատրաստումն ու վերապատրաստումը, իրականացնում ուսումնամանկավարժական և մասնագիտական խորհրդատվական գործունեություն։

Միջազգային կինոկազմակերպությունների հետ գործակցությամբ կինոկենտրոնը ներկայացնում է հայ կինոն համաշխարհային կինոփառատոներում ու կինոշուկաներում, կազմակերպում է հայկական կինոյի օրեր, շաբաթներ ու տասնօրյակներ, նաև մշակում և սահմանված կարգով առաջարկություններ է ներկայացնում կինոարվեստի պահպանմանը, տարածմանն ու զարգացմանը նպաստող իրավական ակտերի վերաբերյալ։


Կինոկենտրոնն իրականացնում է հետևյալ գործառույթները՝ պետական ֆինանսավորմամբ խաղարկային ֆիլմերի, մուլտիպլիկացիոն կինոնկարների, դեբյուտային և ուսանողական ֆիլմերի արտադրության աջակցում, կինո-ֆոտո-ֆոնո հավաքածուի պահպանում, մասնակցություն՝ կինոշուկաներին և կինոփառատոներին։

 

Ծառայություններն իրականացվում են կինեմատոգրաֆիայի ծրագրով՝
«Կինոնկարների արտադրություն», «Ազգային կինոծրագրերի իրականացում», «Կինո-ֆոտո-ֆոնո հավաքածուի պահպանման ծառայություններ»: 

 

Ծրագրերի հիմնական նպատակներն են՝ 

  • կինոարվեստի ավանդույթների պահպանումը, զարգացումն ու տարածումը,
  • աջակցել միջազգային չափորոշիչներին համապատասխան՝ հայրենական արտադրության բարձրարժեք խաղարկային, անիմացիոն կինոնկարների ստեղծմանը,
  • Հայաստանի ազգային կինոկենտրոնի կողմից հաստատված կանոնակարգի համաձայն, ֆիլմերին պետական աջակցություն տրամադրելու նպատակով կազմակերպել մրցույթ՝ ապահովելով ընտրության և մասնակցության հավասար պայմաններ,
  • միջազգային կազմակերպությունների հետ համատեղ կինոծրագրերի իրականցում, միջազգային կինոփառատոներին և միջազգային այլ կինոմիջոցառումներին մասնակցության ապահովումը,
  • ապահովել հայկական կինոժառանգության պահպանությունը, վերականգնումը, արխիվացումն ու հանրայնացումը (ելանյութերի պահպանում, թվայնացում, վերականգնում, տարածում, ինչպես նաև արխիվային նյութերի ուսումնասիրություն և հրապարկում),
  • ներկայացնում է առաջարկություններ կինոարվեստի բնագավառում մշակութային քաղաքականության իրականացվելիք պետական ծրագրերի և նախագծերի վերաբերյալ,
  • իրականացնում է Հայաստանի Հանրապետության կինոքաղաքականության կարևորագույն ուղղությունը՝ հանրայնացնելով հայկական կինոժառանգությունը Հայաստանում և արտերկրում տարբեր ծրագրերի (ցուցահանդեսներ, տեսանյութեր, ինստալացիաներ և այլն) և թեմատիկ ու նպատակային ցուցադրությունների միջոցով։

 

ՀՀ ԿԳՄՍ նախարարության ենթակայությամբ գործող կինոկենտրոնի ենթակառույցներից են Հենրիկ Մալյանի անվան թատրոնն ու Կինոդերասանի ստուդիան։

ԿԱՊ ՄԵԶ ՀԵՏ

  • +374 (10) 52-20-32
  • +374 (10) 52-20-35
  • kinokentron@gmail.com
  • Եզնիկ Կողբացի 83
×

Դուք չեք լրացրել բոլոր պահանջվող դաշտերը