Հոկտեմբերի 30 2024
ԲՊՀ նիստերի մեծ դահլիճում տեղի ունեցավ Էդմոնդ Քեոսայանի «Տղամարդիկ» գեղարվեստական ֆիլմի իսպաներեն ենթագրերով ցուցադրությունը: Ֆիլմը թարգմանել են Վ. Բրյուսովի անվան պետական համալսարանի Իսպաներեն-հայերեն Թարգմանչական գործի 4-րդ կուրսի ուսանողները` դասախոս Ռ. Պետրոսյանի ղեկավարությամբ:
ԲՊՀ ռեկտոր Դ. Գյուրջինյանը ողջույնի խոսքում ընդգծեց միջոցառման կարևորությունը՝ նշելով, որ նման իրադարձությունները ոչ միայն նպաստում են մշակութային փոխանակմանը, այլև ամրապնդում են կապերը Հայաստանի և իսպանախոս երկրների միջև:
Նա շեշտեց, որ հայկական կինոարվեստը հարուստ և բազմազան է, և այն արժանի է ավելի լայն ճանաչման: Հանդիսատեսին մաղթելով հաճելի դիտում` Դ. Գյուրջինյանը հույս հայտնեց, որ ֆիլմը կխթանի նոր հետաքրքրություններ հայկական մշակույթի նկատմամբ:
Հայաստանի կինոյի հիմնադրամի տնօրեն Դավիթ Բանուչյանն իր ելույթում շնորհակալություն հայտնելով ուսանողներին` անդրադարձավ համատեղ նախաձեռնության կարևորությանը և հաստատակամությունը հայտնեց ամեն կերպ նպաստել վերջինիս շարունակականությանը:
Միջոցառմանը ներկա էին բարձրաստիճան հյուրեր՝ ՀՀ-ում Ուրուգվայի Արևելյան Հանրապետության արտակարգ և լիազոր դեսպան Է. Ա. Ռ. Բիդարտը, ՀՀ-ում Դոմինիկյան Հանրապետության դիվանագիտական ներկայացուցիչ Ս. Սանտանան, ՀՀ-ում Արգենտինայի Հանրապետության գլխավոր հյուպատոս Խ. Ն. Պ. Կաստիլյոն:
Ֆիլմի ցուցադրությանը հաջորդեց հայկական հյուրասիրություն Արգենտինական կենտրոնում:
