Հունվարի 30 2016
Ինչպես տեղեկացնում է Եվրոպայի խորհրդի կայքը՝ http://www.coe.int Եվրիմաժն ուրախությամբ ողջունում է Հայաստանին՝ որպես հիմնադրամի նոր անդամ պետության 2016թ. հունվարի 1-ից:
Այս անդամակցության շնորհիվ հնարավոր կլինի հայ համարտադրողների մասնակցությամբ համատեղ ֆիլմարտադրության ծրագրերը ներկայացնել Եվրիմաժին առաջիկա հանդիպումների ժամանակ: Քանի որ Հայաստանին հասանելի չեն «Ստեղծարար եվրոպական մեդիա» ծրագրի աջակցության մեխանիզմները, հայ դիստրիբյուտորները կարող են դիմել աջակցության համար: Նույն կերպ Հայաստանի ցուցադրողները իրավունք կունենան դիմելու Եվրիմաժի ցուցադրությունների աջակցության ծրագրին:
Հիշեցնենք, որ Հայաստանի ազգային կինոկենտրոնը դեռևս 2012 թվականից զբաղվել է Հայաստանի «Յուրիմաժին» (Եվրոպայի խորհրդին առընթեր համատեղ կինոարտադրության հիմնադրամ` Eurimages) անդամակցելու աշխատանքներով, փոքր քայլերով ամեն տարի այդ գործընթացում տեղաշարժեր են եղել, արդյունքում՝ 2016թ․-ի հունվարի 1-ից Հայաստանը միացավ «Յուրիմաժին»:
Կինոկենտրոնի, Մշակույթի նախարարության և համապատասխան այլ կառույցների համառ աշխատանքի արդյունքում այս գործընթացն ավարտին հասավ, ինչը մեծ ձեռքբերում է բոլորի համար։ 2014 թվականին Հայաստանի ազգային կինոկենտրոնի աշխատակիցների կողմից հավաքվեց և պատրաստվեց ամբողջական փաստաթուղթ հայկական կինոարդյունաբերության, արտադրանքի, ֆիլմերի ցուցադրությունների, կինոարտադրող ընկերությունների ու կինոթատրոնների մասին և ուղարկվեց «Յուրիմաժին»։
Բացի այդ, Հայաստանի ազգային կինոկենտրոնի տնօրեն Գևորգ Գևորգյանը տարբեր տարիներին՝ Կաննում հանդիպումներ է ունեցել «Յուրիմաժի» գործադիր տնօրեն Ռոբերտ Օլլայի հետ, քննարկել անդամակցությանը վերաբերող բազմաթիվ հարցեր: Արդեն, 2015 թվականին պատրաստ էին բոլոր պայմաններն ու փաստաթղթերն անդամակցության համար։
Հ․ Գ․ Եվրիմաժը (Eurimages) համատեղ կինոարտադրության, կինոնկարների վարձույթի և ցուցադրության աջակցության հիմնադրամ է, որը ստեղծվել է 1988թ. Եվրոպայի խորհրդին առընթեր և առ այսօր 37 անդամ պետություն ունի (Հայաստանը ներառյալ): Նախկին խորհրդային հանրապետություններից Եվրիմաժի-ի անդամ են Ռուսաստանը, Բալթյան երկրները և Վրաստանը: 1988թ. ի վեր Եվրիմաժն աջակցել է 1726 եվրոպական համարտադրությունների 518 մլն եվրո ընդհանուր գումարով:
