Նոյեմբերի 06 2015
«Նաիրի» կինոթատրոնում նոյեմբերի 4-ին գրախոսականների մրցույթի ամփոփմամբ ավարտվեց «Կինոաշուն» ազգային կինոյի ամիս» ծրագիրը, որի շրջանակներում մեկ ամիս Երեւանում եւ մարզերում ցուցադրվել են մոտ 200-ից ավելի ֆիլմեր: Ազգային կինոյի տոնն այս տարի նվիրված էր Հայոց Ցեղասպանության 100-րդ տարելիցին։ Կինոհանդիսատեսին ներկայացվել են տարբեր տարիներին նկարահանված ցեղասպանության թեմայով գեղարվեստական եւ վավերագրական ֆիլմեր:
«Այս տարի «Կինոաշունը» երկու առաջնային ուղղվածություն է ունեցել․ Հայոց մեծ եղեռնի 100-րդ տարելիցը և երկրի սահմանապահ գյուղերը։ Հատկապես մարզերում աշխատել ենք ցուցադրել հետաքրքիր ու կարևոր ֆիլմեր ազգային թեմատիկայով։ Կինոցուցադրումները սահմանամերձ բոլոր համայնքներում վերածվել են տոնի», - ասաց Հայաստանի ազգային կինոկենտրոնի տնօրեն Գեւորգ Գեւորգյանը:
Մշակույթի փոխնախարար Արթուր Պողոսյանն էլ փաստեց, որ «Կինոաշունը» մեծ պահանջարկ ունի. «Սա նշանակում է, որ մենք խնդիր ունենք կինոարվեստը հատկապես մարզերում ներկայացնելու եւ հանրահռչակելու: Մարզերից արձագանքը մեծ է: Մտավախություն կար, որ մարդիկ կնախընտրեն հեռուստացույցով ֆիլմ դիտել, բայց արձանագրեցինք հակառակը՝ հատկապես մարզերում սպասված են կինոդիտումները»:
Ժյուրիի որոշմամբ 1-ին մրցանակ չընտրվեց, իսկ 2-րդ և 3-րդ տեղերը բաժանվեցին 4 աշխատանքների միջև։
Այսպես, 2-րդ մրցանակին արժանացավ 2 գրախոսական՝ Թամարա Հակոբյանի «Դժբախտ մարդկանց երջանիկ սերը» Արամ Շահբազյանի «Մոսկվիչ, իմ սեր» ֆիլմի համար և Զոհրաբ Սարգսյանի (Սարգիս ՅԱՆ) «Կարմիր երազանքը» նույն ֆիլմի համար։
3-րդ մրցանակը կիսեցին Աննա Նադարյանը («1915») և Զարուհի Սիմոնյանը («1915. Ատելություն 100 տարի անց»), որոնց գրախոսականները Կարին Հովհաննիսյանի և Ալեք Մուհիբյանի «1915» ֆիլմի մասին էին:
