Օգոստոսի 25 2020
Աշխարհում մոլեգնող համավարակը նոր մարտահրավերներին զուգահեռ նոր աշխատանքային կանոններ ու մոտեցումներ է թելադրում։ Հայաստանն անմասն չմնալով այս ամենից փորձում է այլընտրանքային ուղիներ ու նոր գործելաոճ ձևավորել հայկական կինոիրականությունում։
Կորոնավիրուսի համաճարակի բռնկումից հետո, 2020 թ․ մարտից Հայաստանում դադարեցվեցին բոլոր տեսակի շփումները, այդ թվում՝ կանգնեց նաև ֆիլմերի արտադրությունը (նկարահանումներ, հետարտադրություն և այլն)։ Հետևաբար, բոլոր այն կինոնախագծերը, որոնք արդեն ունեին պայմանավորվածություններ նկարահանումների համար՝ կանգնեցվեցին։
Ահա, այս իրավիճակը փոքրիշատե մեղմելու նպատակով էլ Հայաստանի ազգային կինոկենտրոնի (տնօրեն՝ Շուշանիկ Միրզախանյան) և Հայաստանի հանրային հեռուստաընկերության (հանրային հեռարձակողի խորհրդի նախագահ՝ Արա Շիրինյան) պատասխանատուները միավորվել են և միասնական ուժերով փորձելու են աջակցել «ՕՐԴԵՐ» արտադրող ընկերության նախագծին՝ ռեժիսոր Հայկ Օրդյանի, «Զուլալի» ֆիլմն ավարտին հասցնելու համար։
Հարկ է նշել, որ նման աշխատաեղանակը նորություն է հայկական կինոիրականությունում։ Ստեղծված իրավիճակը, կարծես թելադրեց նոր մոտեցում և գործելաոճ, երբ երկու պետական կառույցներ միավորվելով փորձում են դուրս գալ շահած, որպեսզի առաջին հերթին պետության ներդրած աջակցության գումարները նպատակին ծառայեն։
Հայաստանի ազգային կինոկենտրոնի տնօրեն Շուշանիկ Միրզախանյանը համոզված է, որ երկու պետական կառույցների միջև նման համագործակցության այս փորձը ունենալու է դրական արդյունք։ Ավելին, նա գտնում է, որ այն պետք է դառնա շարունակական՝ ներառելով նաև այլ նախագծեր, որոնք գրավիչ կդառնան արտերկրի ներդրողների համար։
Հանրային հեռուստաընկերության խորհրդի նախագահ Արա Շիրինյանը փաստեց, որ համագործակցության գաղափարը Հայաստանի ազգային կինոկենտրոնի ղեկավարինն է ամբողջապես, քանի որ նրա ուղարկած նամակ-առաջարկից հետո են սկսվել բանակցությունները։ Նա հավելեց նաև, որ իրենք մեծ պատասխանատվությամբ են ստանձնել այս համագործակցությունը, քանզի գիտակցում են, որ այսօր մեր պետության յուրաքանչյուր աջակցություն պետք է նպատակային լինի։ «Հանրայինի աջակցությունը ոչ միայն գեղարվեստական արտադրանք ունենալն է, այլ COVID-19-ը համավարակի տնտեսական հետևանքները վերացնելը։ Այս պարագայում աջակցել ֆիլմի ավարտմանը» - ասաց նա։
Հայաստանի ազգային կինոկենտրոնի աջակցությունը ֆիլմին կազմում է 40 մլն դրամ, իսկ Հանրային հեռուստաընկերությանը՝ 20 մլն։ Բացի այդ, Հանրային հեռուստաընկերությունը ստանձնել է ֆիլմի տեղեկատվական և քարոզչական (PR)՝ աշխատանքները:
