Փետրվարի 19 2020

Հայաստանն առաջին անգամ իր առանձին տաղավարով փետրվարի 20-27-ը պաշտոնապես կներկայանա Բեռլինի միջազգային կինոփառատոնի շրջանակում գործող Եվրոպական կինոշուկայում (EFM – European Film Market): Այս մասին փետրվարի 19-ին՝ ասուլիսում, հայտնեցին Հայաստանի ազգային կինոկենտրոնի տնօրեն Շուշանիկ Միրզախանյանը և գեղարվեստական ղեկավար Մելիք Կարապետյանը:

Հայաստանի ազգային կինոկենտրոնի տնօրեն Շուշանիկ Միրզախանյանի խոսքերով, դեռևս 2019 թվականին, երբ ինքը մասնակցել է Բեռլինի կինոշուկային, ականատես է եղել մի փաստի, որ կինոշուկայում աշխատող հայ կինոգործիչները չունեն տարածք, որտեղ կարողանան ներկայացնելու իրենց արտադրանքը, կազմակերպելու հանդիպումներ ու միջոցառումներ․ «վերադառնալուն պես, անմիջապես դիմեցի ՀՀ կրթության, գիտության, մշակույթի և սպորտի նախարար Արայիկ Հարությունյանին, որպեսզի աջակցեն մեզ 2020 թվականին կինոշուկայում սեփական տաղավար ունենալու գործին: Նախարարության պատասխանատուները գնահատելով խնդրի կարևորությունը ընդառաջեցին, և նրանց շնորհիվ մենք արդեն ունենք այդ հնարավորությունը»։
«Հայաստանյան փոքրաթիվ պատվիրակության թիմում է նաև նաև ՀՀ ԿԳՄՍ փոխնախարար Արա Խզմալյանը: Այցելության ընթացքում հրավեր ունենք Պոտսդամի կինոինստիտուտից, ինչը հնարավորություն կընձեռի տեղում ծանոթանալու գերմանական կրթական կինոծրագրերին ու գործունեությանը առհասարակ»,- նշեց Շուշանիկ Միրզախանյանը:
Շ․Միրզախանյանը հայտնեց, նաև որ Ազգային կինոկենտրոնը փոխում է (ռեբրենդինգ) կինոկենտրոնի լոգոն և բեռլինյան կինոշուկայում արդեն կներկայանան նոր լոգոյով և նոր ոճով։ Ավելի ուշ, պատրաստ կլինի նաև Ազգային կինոկենտրոնի նոր կայքը, որը կունենա նոր ու ժամանակակից հնարավորություններ։
Կինոկենտրոնի գեղարվեստական ղեկավար Մելիք Կարապետյանը հայտնեց, որ կինոշուկայում ներկայացվելու է շուրջ 50 հայկական ֆիլմ: Հատուկ Բեռլինի կինոշուկայի համար տպագրվել է կատալոգ, որում ներառվել են և կինոկենտրոնի կողմից աջակցություն ստացած, և անկախ ստեղծագործողների ֆիլմերն ու նախագծերը։
Ազգային կինոկենտրոնի տնօրենը լրագրողներին տեղեկացրեց 2020թ. փետրվարի 28-ից մարտի 14-ը ամերիկյան մայրցամաքում կայանալիք միջոցառումների մասին։ Վաշինգտոնի ազգային պատկերասրահը (National Gallery of Art) համագործակցելով ԱՄՆ-ում ՀՀ դեսպանության և Հայաստանի ազգային կինոկենտրոնի հետ կազմակերպում են «Հայկական ոդիսական» հայ մշակույթին, երաժշտությանը և ֆիլմերին նվիրված բազմաշերտ փառատոն, որի շրջանակներում ամերիկյան հանդիսատեսին կներկայացվեն հայկական կինոժառանգության բացառիկ նմուշները և հայկական երաժշտություն՝ Վաչե Շարաֆյանի և Արամ Խաչատրյանի գործերը։
«Մեզ համար սա շատ կարևոր քայլ է՝ ամերիկյան հանդիսատեսին ներկայացնելու հայկական կինոժառանգության բացառիկ նմուշները: Միջոցառմանը ցուցադրվելու են Համո Բեկնազարյանի «Զանգեզուր» (1938), Սերգեյ Փարաջանովի «Նռան գույնը» (1968) և «Հակոբ Հովնաթանյան» (1967) ֆիլմերը։ Մշակութային այս միջոցառմանը մեր մասնակցությունը ապահովելու համար ԱՄՆ-ում ՀՀ դեսպանատունը շատ մեծ աշխատանք է կատարել»,- ասաց տիկին Միրզախանյանը:
 

ԲԱԺԱՆՈՐԴԱԳՐՎԻՐ

ՏԵՂԵԿԱՏՎՈՒԹՅՈՒՆ

The National Cinema Center of Armenia NCSO, established by the order of the RA government in 2006, is a state non commercial organization and a successor to «Armenfilm » studio named after H. Beknazaryan / 1923/, which operates within the structure of the Ministry of Culture of Armenia.

ԿԱՊ ՄԵԶ ՀԵՏ

  • +374 (10) 52-20-32
  • +374 (10) 52-20-35
  • kinokentron@gmail.com
  • Եզնիկ Կողբացի 83

ԱՆԴԱՄՆԵՐԻՆ

×

Դուք չեք լրացրել բոլոր պահանջվող դաշտերը